Argon payvandlash
Argonli payvandlash — bu elektr yoyidan foydalaniladigan, volfram elektrodi va argon gazidan foydalanuvchi payvandlash usulidir. Ushbu texnologiya TIG (Tungsten Inert Gas) deb ham ataladi. Argon gazining asosiy vazifasi — payvand chokini havo aralashmalaridan (kislorod, azot) himoya qilish va oksidlanishni oldini olishdir, bu esa sifatli va mustahkam chok hosil qiladi.
Jarayonda volfram elektrodi va asosiy metall o‘rtasida elektr yoyi paydo bo‘ladi. Gorilka orqali doimiy ravishda argon gazi beriladi. Agar kerak bo‘lsa, qo‘shimcha sim (pripoy) qo‘lda kiritiladi. Argonli payvandlash zanglamaydigan po‘lat, alyuminiy, titan, mis va magniy kabi nozik metallar bilan ishlashda juda foydalidir.
Afzalliklari:
- Juda toza, chiroyli va bardoshli choklar;
- Shlak va uchqunlar deyarli yo‘q;
- Korroziyaga yuqori chidamlilik;
- Yupqa va nozik materiallar bilan ishlash imkoniyati;
- Qiyin joylarda ham sifatli payvandlash imkoniyati.
Argonli payvandlash aviatsiya sanoati, tibbiy jihozlar, ovqat sanoati, bosimli idishlar ishlab chiqarish va alyuminiy qismlar ta’mirida keng qo‘llaniladi. Ushbu usul yuqori malaka talab qiladi, lekin natijasi juda yuqori sifatli bo‘ladi. Bugungi sanoatda eng aniqlik talab qilinadigan va ishonchli usullardan biri hisoblanadi.